Aurten Arrazakeriaren aurkako gida pedagogikoa estreinatu dugu, arrazakeriaren aurkako begirada bat emateko hezkuntzan. Gida horrez gain, arrazakeriaren aurkako hezkuntzaren arloko tailerrak eta prestakuntza eskaintzen ditugu (ikastetxeak eta hezkuntza-institutuak).SOS Arrazakeria Bizkaiko SOS Arrazakeriaren batzarretik hezkuntza eta pedagogia ezinbestekotzat jotzen ditugu arrazakeriaren aurkako borrokan. Eragin politikoa eta sentsibilizazio-ekintzak bi elementu horietatik bideratu dira hiru hamarkadatan, hezkuntza formaleko zein hezkuntza ez-formaleko testuinguruetan.

Ikastetxeek eta hezkuntza-institutuek, hezkuntza-errealitatearen agertoki diren aldetik, agerian uzten dituzte Bizkaiko gizartearen eraldaketak, testuinguruen dibertsifikazioa agerikoa baita, bai maila kulturalean, bai sozialean. Hala ere, hezkuntza-erakundeen rolak, eraldatu egin den arren, ez du gizartean duten eginkizun nagusia utzi. Zeregin horrek, desberdintasunak murrizten lagundu nahi duen arren, desberdintasun sozial, politiko, kultural eta ekonomikoen ugalketan ere eragiten du.

Neurri handi batean, aniztasuna eta desberdintasuna hezkuntza-testuinguruaren zati gisa ulertzen ez direlako gertatzen da hori. Hezkuntza-erakundeen ahalmen eraldatzailea agerian uzteko, beharrezkoa da onartzea hezkuntza-testuinguruak kultura anitzeko egoera batek zeharkatzen dituela, hau da, kultura bat baino gehiago elkartzen diren testuinguruak direla, eta, horrez gain, kulturartekotasun kritikoko praktika batera igaro behar dutela, egungo hezkuntza-, gizarte-, kultura- eta ekonomia-politiken izaera homogeneizatzailea eta funtzionala zalantzan jartzeko, biztanleria-talde txiki bat lehenesten baitute.